❇️Туннэ, 27 шуркынмонэ, 90 арес тырмонзэ пусъе Можга ёросысь Чужъем гуртысь Петрова Елизавета Ивановна.
Елизавета Ивановна вордӥськиз Белогузка гуртын яке, удмурт сямен вераса, Гурезьйылын. Пичи но пинал дырыз тупазы улонмылэн тужгес секыт вакытъёсаз — ожгар вакытъёсы.
6 арес тырмыса вуттӥз гинэ, улонысь атайзы кошкиз. Сизьым нылпиен кылиз анайзы. Самой пичиезлы 13 нунал вал. Кутскизы уката ик секыт вакытъёс, соин сэрен но выжоно кариськизы анайзылэн вордӥськем гуртаз — Чужъем гуртэ.
Ӧз кушты гурт калык та семьяез, маин быгатӥз юрттӥз. Озьы быдэсмизы но будӥзы ваньзы ик сизьым нылъёс но пиос. Дышетскыны но кылдӥз 4 классозь гинэ. Угось, анайлы юрттоно, пичи вынъёсыз но сузэръёсыз понна сюлмаськоно. Озьы кутске Елизавета Ивановналэн ужан вакытэз.
Пенсие потытозяз пудо вордон удысын тыршиз. «Вань пудоез утялтӥ, курегъёсты гинэ ӧй сюды, » — шуэ Елизавета Ивановна.
Трос йӧл кыскемез понна 1955 арын Москвае но вуылӥз.
Тыршыса ужамез понна, «Ужысь ветеран» нимын пусъемын.
Трос нылпи будэтэмез понна «Медаль материнства» сётэмын.
Кузпалэныз валче вить нылпи будэтӥзы. Ваньзы ик асьсэзыс улонысь шедьтӥзы но йыг-йыг семья кылдытӥзы.
Елизавета Ивановна яратӥсь, капчи мылкыдо анай но песянай. Вань сюлэм шунытсэ туннэ кузьма нунокъёсызлы.
Ӟеч но тазалыко улон сӥзиськомы ми но тӥледлы, Елизавета Ивановна. Котьку ик корка котырды чылкыт но шуныт мед луоз нылпиостылэн яратонэнызы но гажанэнызы.
#Можгаёрос
